Carta a los Reis Magos

Nuestra colaboradora Lláncara nos envía, como en años anteriores, su carta a los Reyes Magos, escrita en leonés pero que no dudamos que, prestándole un poquito de atención, entenderéis perfectamente ¡Que vos preste!

Queríos Reis Magos:

Cumu vosoutros tolu sabedes, nun fae falta dicire qu’esti annu que ta finandu fui bona enforma anque la xente diga que non. Pesia tou, vou pedivos unas cousinas que, de xuru, vais traenos pa los del Reinu de Llión y pa los outros, anque quiciabes nun yes presten.

Pa doña Isabelita, la presi la Dipu, un espeyu especial, que siempres ye diga lu guapísima que ye. La probina tien falta de que ye digan que ye la más guapa de tolas políticas del Reinu. Lu de repispa yá lu tien asumíu de sobras. Pa los del PP, esti annu vamos pidire prudencia, xusticia, fortaleza y templanza. Las cuatru virtues que van faceyes mueita falta. Pa don Juanvi, un “pepón”.

Pa los del PSOE, una fueya ruta na que tea bien nidiu onde ta’l País Llionés y lu esquicíu que lu tienen. Pémeque van pul mal camín y asina nun van ganare un res. Esti annu tendrán que tomare tila pur barriles y cubetos. Tou esfoutu merez una recompensa. Y éstos tarán reventáos dafeichu. Y pa mister Rodriguez Zapatero, un “hippiese” pa que s’oriente.

Pa los d’UPL, mueitos rabos de zreizas, purque van mal de la memoria y nun s’alcuerdan de lu que dixon nos congreisos que tantu yes prestan. Tamién deillos chaveiros pa guardare tolas chaves que dicin que van tenere’l prósimu annu. You estu de “las chaves” nun sou quien a pescancialu, ¡cousas de la política y la estratexia!

Pa los collacios de mieu y la que ta escribiendu estas lletras pidu grandes dosis “d’Amabilina” y “Aguantiforme”. Dúos melicamentos cimeiros pa capiare’l temporal y la crisis que nun fina.

Cumu taréis bien informaós de tolas nuevas qu’asoceden nel nuesu Reinu, nun vos repetiréi lu mal que vamos. La Cultura Llïonesa anda bastante esqueicida. A vere si podemos resolveré las temas de Llancia, l’hospital y el Circuitu Velocidá pal mieu pueblu, los problemas del desempleyu, la xubilación tardía y tolu demás.

Pa min vou pedivos bien poucu, ispiración y tiempu pa sigir escribiendo y poder adeprendere más y más la nuesa llingua que tantu sofitu necesita. Tamién vos pidu pacencia y más pacencia. Tamos aguardandu pula AUTONOMÍA que nun chega. A lou miyor si faláis cunos políticos vos facen casu. Esti annu, cumu hai eleiciones tendremos de dayes ideyas a los cuitadines.

Al lláu’l Ramu tenéis los dulces y l’aguardienti arregláu. Las fueyas del annu pasáu pémeque las llevóu’l vientu purque los 1100 annos del Reinu, pasonun ensin pena ni gloria. Poru, los mieus collacios y you sigiremos dandu tralla.

Namái quieru dicivos que nun tou arrepentía más que de las cousas que nun fizi y tampoucu nun quieru carbón, que la tema ye peliaguda. Y nun vou amentare lu de la lletricidá purque pueden saltare chispas y cruzáseme los cables.

Vémosnos en Xineiru y seyes na Basílica Santu Sidoru cul envís d’amosavos la mia fe nel Reinu Llión y la sua AUTONOMÍA.

Vou llimpiare’l zapatu...

Lláncara

Carta a los Reis Magos

Nuestra amiga Lláncara nos envía la siguiente carta a los Reyes Magos. Está escrita en leonés y estamos seguros de que todos, con un pequeño esfuerzo, podréis entendela.

Contrariamente a nuestra costumbre, en esta ocasión no hay negrillas. Opina el Húsar que toda ella debiera llevarlas, sin embargo se pregunta si no pedirá Lláncara demasiado. Toda su carta podría resumirse, como los mandamientos, en dos. Justicia para el País Leonés y sentido común para los políticos ¡Ahí es nada!

¡Pobres Reyes Magos si tienen que cambiar a los políticos ¿leoneses?! ¡¡¡Con toda su magia y santidad les va a resultar difícil!!!

Queridos Reis Magos:

Bien sei que teneis trabayu abondu n'estas datas, pese a tou vou pedivos unas cuantas cousinas pa tolos llïoneses. Entamandu pulos políticos que son los que tienen el sartén pul mangu... vosoutros yá pescanciais.

Pal cabezaleiru de l'autonosuya, ye urxente una pareya estable, que se quieran enforma y deixe de querere tantu a los demás. Pa doña Isabel, la presi de la Dipu, un abriguín de pieles que la probe anda, cumu Cruella de Vil, a la geta del de piel de lleona, que ye'l que nun tien entá. Pa los del PP, coherencia en grandes dosis, tila pa los nervios y un manual d'hestoria y cultura llïonesa.

Pa Rodriguez Zapatero una axenda y una mapa, que sepa ónde tamos. Que s'alcuerde de poner industrias que traigan xente y que la mocedá nun tenga que marchare d´eiquí. Un Hospital Comarcal pa La Bañeza-Astorga, el circuitu de velocidá, meyores carreteiras... Que nun nos ponga lu que naide quier: vertedeiros, llíneas d'Alta Tensión que destruyan la nuesa montaña, pantanos que riegen outras tierras, etc.

Pa los de la UPL un estuche de manicura pa que seyan a amosare las garras bien atuldadinas, que tengan cuidadín cunos socios de gobiernu de la "capi" y que nun deixen entrare los raposos qu'andan sueltos.

Y lu cimeiru: que tolos políticos deprendan LLÏONÉS, que va chegare l´autonomía y va pillayes cunos deberes ensin facere. Los de la UPL que den exemplu y que faigan cursus aceleráos y que aprueben cun nota.

You fui bona este añu, cumu siempres, anque digan que sou rempondona, pedigueña y que reburdiu tol ratu. You quieru un perióidicu pa que tola xente seya a espresare la sua opinión llibremente.

Pa finar, un deseyu de parte de tola Rexión Llïonesa: ¡¡¡AUTONOMÍA!!! anque tengais que facere maxa ou conxuros, peru mirai que nos vamos faciendu vieyos y yá tamos cansos de glayare. Nun seya que dalgún lloucu, mui cuerdu y mui fartu, faiga dalguna fatada...

N´esti añu de crisis, outru más, nun nos deixeis arrequeixáos. Dainos fuercias pa segire lluitandu pula nuesa tierra.

Post-data: Yá vos puse unas copinas d'oruxu y unas rosquillas al lláu del Ramu. Tamién hai unas fueyas en brancu pa que nos deis idegas y sofitu pa preparare´l 1100 Aniversariu del Reinu de Llión.

Perdonai los erros. Salú, paz y prosperidá pa tolos Llïoneses nel 2009.

LLANCARA