lunes, abril 19, 2010

I Concursu de Composición Coral del Reinu de Llión

Recibimos en nuestro buzón de correos la siguiente convocatoria del Ayuntamiento de Astorga que dejamos aquí para general conocimiento. La información nos ha llegado solamente en leonés pero estamos seguros de que no tendréis problemas de comprensión:

Con motivu de los actos conmemorativos del 1100 Aniversariu del Reinu de Llión, l'Ayuntamientu d'Astorga convoca'l I Concursu de Composición Coral Reinu de Llión-Astorga 2010 conas bases que vienen arréu:

1ª Podrán tomar parte nel mesmu: tolos compositores nacidos ou residentes n'España.

2ª A esti Concursu podrán presentase obras musicales pensadas y creadas pa ser interpretadas a capella por agrupaciones corales polifónicas. Las obras tarán escritas a cuatro voces mistas, tendrán testu cantable y una estensión llibre.

3ª La temática de las obras habrá faer alusión a dalgún aspeutu de la cultura, historia, etnografía ou identidá del Reinu de Llión. Habrán de tener igualmente un títulu identificable.

4ª Las obras presentadas habrán de ser orixinales en música y lletra, nun tar suxetas en nengún de los sous aspeutos a dereichos d'autor, y que nun foran estrenadas nin presentadas parcial ou totalmente en nengún outru concursu de composición anterior.

5ª Las piezas musicales presentadas podrán ser manuscritas, ou escritas con dalgún programa d'edición de partituras, pero en tou casu tendrán que ser copias orixinales.

6ª Cada participante presentará namái una obra por quintuplicáu (la pieza orixinal y cuatro copias de la mesma), que va dir firmada con suedónimu. N'outru sobre zarráu más pequeñu incorporará los sous datos personales xunto con una direición y teléfonu de contautu.

7ª El plazu de presentación d'obras quedará zarráu conas obras unviadas hasta'l día 30 del mes de San Xuán de 2010 inclusive, (según data del matasellos de correos).

8ª Las obras a concursu, xunto conos datos personales y de contautu del autor, tendrán que ser remitidas a la siguiente direición:

Ayuntamientu d’Astorga.
Concursu de Composición Coral Reinu de Llión.
Plaza España s/n
24700 Astorga (Llión).

9ª La Organización del “I Concursu de Composición Coral del Reinu de Llión” establez los siguientes premios:

1º Premiu: 1000 euros
Accésit: 500 euros


10ª El “I Concursu de Composición Coral del Reinu de Llión” tendrá un xuráu compuestu por músicos especialistas y el sou fallu será inapelable. Ésti produciráse a lo llargo del mes de Santa Marina de 2010. El xuráu resérvase'l dereichu de poder deixar dalgún premiu ermu, si la calidá de las obras presentadas asina lo aconseya.

11ª La Organización contautará namái col ganador del 1º Premiu y del Accésit. Los resultaos del Concursu fairánse públicos nos principales medios de comunicación de la Rexón Llionesa. Si dalgún autor nun galardonáu quier recuperar la obra presentada tres el fallu, podrá facelo nel Ayuntamientu d'Astorga, nel mes siguiente al de la proclamación del ganador.

12ª Los ganadores del 1º Premio y del Accésit mantendrán l'autoría sobre las obras premiadas. Sicasí, comprométense pol meru feichu de participar nel Concursu a permitir la interpretación llibre de la sua obra por cuantas corales quieran faelo, ensin qu'ello xenere una contraprestación económica pa los autores nin pa nenguna organización de xestión de dereichos d'autor.

13ª La obra ganadora del 1º Premiu del “I Concursu de Composición Coral del Reinu de Llión” estrenaráse con motivu del “I Festival Coral Reinu de Llión” pola Coral “Excelsior Ciudad de Astorga”, que se podrá faer acompañar por cuantos coralistas ou agrupaciones corales estime axeitáu. Será esta Coral la depositaria permanente de las obras premiadas, que tarán por outra parte a disposición d'aquellas agrupaciones corales que soliciten por escritu una copia de las mesmas.

La Organización del Concursu de Composición Coral Reinu de Llión resérvase'l dereichu de faer una edición impresa de todas aquellas piezas presentadas a concursu qu'estime axeitáu en cualquier momentu, ensin qu'ello xenere tampouco una contraprestación económica pa los sous autores nin pa nenguna organización de xestión de dereichos d'autor. Los músicos participantes nesti Concursu comprométense pol meru feichu de participar nel mesmu a permitir dicha publicación nos términos referidos nesti puntu.

14ª Nel trescursu del “I Festival Coral Reinu de Llión” fairáse entrega a los ganadores del Concursu de Composición Coral del Reinu de Llión del galardón amentáu por parte de representantes del Ayuntamientu d'Astorga.

No hay comentarios: