LLANCIA ESQUEICIDA

Este es el título del artículo que nos envía nuestra colaboradora Lláncara, desde La Bañeza, escrito en lengua leonesa. Creemos que, con un pequeño esfuerzo, podréis entenderlo. No olvidéis que si nos preocupamos por la desaparición de una especie vegetal o animal, por la destrucción de un monumento o una obra de arte, no podemos permanecer indiferentes ante la desaparición de una lengua que conlleva también la de una parte de nuestra cultura e identidad.

También es nuestra responsabilidad evitar la desaparición de la lengua leonesa ¡Por ecologia!

Guei domingu, en vé de quedar en cá gueyandu la tele, amurniada pur tolas fatadas que tenemos que soportare, fui a dar una vueltina pur Llancia.

Llancia, estratexicamente situada nuna colina, non mui lluenxe de la ciudá de Llión, ye una de las meyores amuesas del nuesu gloriosu pasáu ástur. La hestórica ciudá resistiou heroicamente l´asediu de los Romanos, lu mesmu que Numancia (peru resistiendo cuasi un sieglu más). Nun sedrá pur facere comparanzas peru nosotros mesmos nun somos a pescanciare la importancia de los restos arqueolóxicos que tenemos eiquí.

Visitárala yá van deillos años y quedeime priocupada dafeichu al vere lu poucu qu´avanzan las escavaciones, la desidia y l´abandonu del llugar nel que una solitaria moza facía de anxel custodiu de l´ ayalga que tenemos que protexere pa que las xentes del futuru tengan alcordancias del nuesu pasáu, pa tare arguyosos de la nuesa historia y pa nun repetir erros d´antañu.

¡Pena de restos ástures, del cabeiru bastión de la resistencia a la escontra´l invasor!. Dióume pur camentare que si camudara´l llugar, pur exemplu, pa los chanos de Castiella, taría llevantada tola ciudá, en perfeutu estáu pa que la visiten los escolines de tol universu deixandu eillí los cuartos pal caltenimientu de las obras de restauración.

Agora, son outros los invasores, los qu´afuracan la nuesa montaña, los que ponen redes d´alta tensión pur cima las nuesas tiestas, los qu´atollan pueblos cun pantanos que nun riegan las nuesas tierras, los que dicin que nun hai que facer imposiciones de dengún xeitu, peru imponen la sua llingua ensin deixare outra fala, que ye la de nuesu. Los que deixan qu´outras empresas xestionen los nuesos fondos, el nuesu patrimonio, la nuesa hestoria…

Feichos cumu los de Llancia, hai milenta mil. Sólu falta que tola xente seya a amosare la sua rabia y la sua firme decisión de camudar esta situación vergoñosa.

Entrúgume ónde tan los homes y las muyeres que seyan el bastión autual pa plantare cara al invasor. Pémeque si nun somos nosoutros, naide lu va facere pur nos.

Pur si tou estu ye poucu, ye posible que l´autovía Llión-Valladolí pase pul mediu´l tarrén de Llancia, estrozándolu tamién. ¿Sigiremos cunos brazos cruzáos?

Lláncara

La Bañeza, Xuliu y 12 de 2009.